عندي سؤال وأتمنى أحصل الإجابة عندكم ؟؟؟؟

السلام عليكم ورحمة الله وبركاته ،،،

لو سمحتو خواتي الحوامل والأمهات عندي سؤال
أنا أم وحامل في الشهر الثالث ألحين وعلى فكرة هذا مو أول حمل ..
لكن هذي أول مرة يستوي فيني جذي .. أدري طولت عليكم .. بدخل في الموضوع

من حملت وأنا أحس بطني منفوخ علي من ولا شي .. كل ما آكل أحس بألم في معدتي ونفخه أعوذ بالله منها (تقولين حامل في الشهر الخامس) ودوم جبدي لايعة وأبغي أرجع بس ما أقدر وطول الوقت طايحة وميودة بطني من الويع

وعلى فكرة رحت للدكتورة قالتلي ما أقدر أسويلج شي انتي توج في أول الحمل وأي دواء بيأثر علي ومنعتني أكل كل شي فيه بهارات أو حوامض (برتقال، ليمون) أو حتى أي شي حار (حليب، شاي، قهوة) وقالتلي كلي بس أكل مسلوق

إلي مرت بهذي الأعراض تقولي شو سوت عشان ترتاح من هذي النفخة والألم

حبيبتي لا تحاتين من خلال كلامج انتي عندج مشاكل في المعدة

حاولي انج تشربين حليب بارد

وفعلا ابتعدي عن التوابل وكل ما ذكرته الدكتورة وكلي شي سهل وخفيف على المعدة

ومبروك الحمل

انا مريت باللي مريتي فيه و مرااات احس بالام حتى التنفس ما اقدر عليه الله يعين

هذا ناتج عن الغازات مع انه حملي السابق لم يكن بهالطريقة

بس غريبة ليش ما عطتش دوا مال الغازات هووو ما ياثر ابدا انا دكتورتي كتبت لي عليه و اول ما احس بنفخة ابدا اشربه 3 مرات باليوم و هوو شراب لونه ابيض و انا اييبه من الصيدلية ب 7 دراهم اسمه
كير لوكس وااايد روعة

استعمليه و لا تخااافي انا صح اكل كل شي بس ابتعد من السوالف اللي تحرض الغازات مثل التوابل و الشغلات الحارة و المشروبات الغازية و شوربة العدس

و من شااان الوحم في دوااا يوصفونه الدكاترة و بعد ماله اي مضرة مشااان البيبي تقدرين تستعملينه و اهو يخفف اللوعة وااايد

و الله الموفق

مشكورة وما قصرت الغالية على ردج السريع

والله إني استانست يوم شفت ردج عزيزتي

أنا فعلاً عندي مشكلة من قبل لا أحمل (قالتلي الدكتورة راس المعدة عندي تعبان)

بس ما حطيت في بالي إنه بيأثر علي وأنا حامل

عالعموم مشكورة على ردج والله يبارك فيج وشكلنا كلنا في الهوا سوا

شكلج في الشهر الرابع (الله يتمملج على خير حبيبتي)

ويرزقنا الذرية الصالحة يا رب

هلا والله بمشرفتنا الغالية .. ومشكورة غناتي على ردج لي

وفعلاً عطتني الدكتورة دوا للغازات اسمه موكسال .. لكن ما فادني وايد (لأني ما قادرة أبتعد عن التوابل والفلفل) بس بجرب الدواء إلي كتبتيلي إياه وعالله..

وأما عن الدواء الثاني لو تكتبيلي اسمه .. لأن الدكتورة ما عطتني اي دواء حق اللوعة

وشكلج ويانا (بس افتكيتي من الوحام .. وما باقيلج شي) يالله .. الله يكون في عونا والله

ويتمم هذا الحمل على خير ويرزق أمة محمد كل خير يا رب

غاليتي بالنسبة للشاي و القهوة أنا نصحوني الأطباء أني ما أشربهم أو أقلل منهم ..

لأنهم يسببون إمساك خصوصاً للحامل .. وحتى البهارات نصحوني أبتعد عنها لأنها تهيج المعدة ..

فهذا الشيء طبيعي بخصوص نصائحهم .. وأحتمال الإحساس اللي تحسين فيه في معدتج .. ناتج عن الأشياء اللي خبروج توقفين عنها ..

انا خبرت الدكتورة أني أعاني من ألم في المعدة يشبه الإمساك .. خبرتني أوقف عن شرب الشاي و القهوة و الكوفي و الكاكاو الحار لأنهم يسببون الإمساك .. وحتى التفاح نصحتني أوقف عنه لأنه يساعد على الإمساك .

إن شاء الله ما عليج شر حبيبتي ..

جزاج الله ألف خير أختي نور الفجر على الرد

بس أنا إلي فيني هو راس المعدة مسببلي مشاكل مالها اول ولا تالي

وكنت فاكرة إن كل هذا بسبب الوحام .. قلت مو مشكلة كم شهر وأفتك .. لكنها فاجئتني وقالت هذا الألم توا في البداية
يعني كل ما تكبر كرشتي وبيضغط الياهل على المعدة كل ما بيزيد الألم

أما بالنسبة للقهوة فشكله وحامي عليه ما قادرة أودرها

أدعولي بس الله يسهل علي ويسر أمورنا يا رب

حبيبتي الصراحة انا مفتكة بهالحمل من اللوعة و الوحااام .. اخ تعبت منه في حملي السابق

الدوا مال اللوعة مو متاكدة بتاكد لج من اسمه و بقووولج عليه

في دوا ثاني للحموضة و الحرقة وااايد رهيب انا دليت بناات من المنتدى عليه و كثير ناسبهم
اسمه
gaviscon
في نوعين انت طبعا بتاخذين المخصص للحوامل .. تصدقين مرااات الحموضة و الزيووت احسها تطلع لي لين حلجي بس و الله مع هالدوا الله سترها معاااي جربيه و قولي لي رااايج

ايه تذكرت

حبوب Navidoxin المشهور لغثيان الحمل

الله يسهلها عليكي يارب

You may also like...

Add a Comment

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.