التكليف فى قطاع السجون

التكليف فى قطاع مصحه السجون
هنتكلم فى الموضوع ده عن التكليف فى مصلحه السجون وايه مميزاته وعيوبه والخطوات ايه وكل حاجه عنه

قبل ما نبدا لازم نتكلم بصراحه نصيحه اخويه ما حدش يقعد فى الصحه حتى لو هيروح السجون لان طبعا الصحه حاجه كده هتكره نفسك فيها ما فيش مرتب ولا تعليم ولا حاجه خالص خلاف هتضيع سنه ونص على الاقل ممكن تستغلهم فى تحضير الماستر
طيب لوما فيش حد عرف يعمل موضوع نقل التكليف وقعد فى الصحه يعمل ايه نقول له ذاكر اى زماله لو ناوى على باطنات ذاكر mrcp
ولو على جراحات ذاكر mrcs
ولما تتوفر الفلوس معاك توكل على الله وامتحنها
طبعا الاماكن المتاحه لنقل التكليف كتير اشهرهم
الجيش -الشرطه خدمات وسجون –
فيه طبعا كمان حاجه كدا محتاجه واسطه او مش واسطه كوووووووووووسه جامده اوى علشا تعملها وهيا تعمل نقل تكليف مش انتداب زى الجيش والشرطه دى تعمل نقل تكليف لحاجه اسمها الاداره الطبيه بالجامعه ده محتاج واسطه عاليه اوى اوى ده بيبقا تبع الجامعه فى الاساس والواسطه بتظبطه بعد كده جوا الجامعه نفسها طبعا لو سالتم عليها هتعرفوا تفاصيل اكتر بكتير ده اللى اعرفه عنها
فيه حاجه كمان شبهها كده بس انتداب للجامعه من التكليف دى برده كووووسه عاليه اوى واحد صاحبى عاملها بالست ايام ده اسمه انتداب كلى
فيه حاجه اسمها انتداب جزئى اللى هوا النائب الزاير بس محتاج كوسه علشان تخلى من الصحه وتقدم فى الجامعه القانون فى الجامعات المحتررمه مش بياخد الدفعات الجديده لانه بياخد واحد عدى عليه سنه من التخرج او واحد معاه فرست ماجستير على الاقل بس كله كووووسه حاول تعمل اى مصلحه وتستفيد

معلش الكلام ممكن يكون متشائم للى بيقرا بس والله دى الحقيقه
عندك الجيش مثلا اللى معاه واسطه هوا اللى بيدخل غير كده نسى حتى لو طالع الاول على القصر العينى واللى يقول انه راح الجيش من غير واسطه كدااااااااااااااااااااب كداااااااااااااااااااااااااب

التكليف فى مستشفيات الشرطه او الخدمات ده برده فيه واااسطه بس مش اوى زى الجيش الحقيقه

السجون محتاجه زقه بسيطه اقلهم فى الواسطه بس انا الحمد لله دخلت من غير واسطه ولا حاجه وتقديرى العام جيد
ليه بقا لانه ببساطه البنات بتمتنع عن التقديم فيها وبكده فرص القبول بتزيد

اخر حاجه علشان تحضر بدرى هوا انك تعمل طبيب حر بس انا مش محبذها الا لو فعلا هتستقيل
انما لو ضربت ورق وسجلت حر فيها شبهه فلوسك كلها اللى هتكسبها هيكون فيها شبهه فلازم تاخدوا بالكم كويس

معلش انا اتكلمت على التحضير عموما وفى الحاجات المشهوره اوى
هتلاقوا حاجات تانيه زى تيودور بلهارس ونقل الدم والاسعاف ما فيش عندى معلومات عنهم الحقيقه تكفى

معلش انا طولت فى الحته دى بس لازم الناس تعرف الخيارات اللى قدامها ايه كويس علشان تعرف هتتحرك ازاى وهتروح فين كل واحد حسب اهدافه

التقديم بقا فى الشرطه
هتروحوا مستشفى العجوزه وتقدموا ورقكم اى حاجه تكون معاكم
شهاده تخرج مؤقته ايامنا ما كانوش ادوها لينا كنا بنطلع حاجه اسمها بيان نجاح مكانها
صوره بطاقه
صور شخصيه تقريبا 4 خد 6 معاك
شهاده ميلاد

تقريبا دى الحاجات المطلوبه
وتستنى النتيجه بتبان فى فى اخر شهر 2 واول شهر3
بتكون انتا ساعتها بتقدم عادى فى تكليف الصحه واتوزعت كمان على وحده صحيه
بتستنى النتيجه بتعرفها عن طريق حاجتين
اولا هما بيتصلوا عليك من العجوزه زى ما حصل معايا
ثانيا انت اول ما تسمع ان النتيجه طلعت روح اسال ان ممكن يكونوا اتثلوا على البيت عندك وما حدش رد فالموظف مش هيكلف خاطره ويرن تانى او على موبايلك وكنت قافله فتروح تسال وتتاكد
طيب النتيجه ظهرت والحمد لله اتقبلت
بتروح لاداره التكليف عند واحده ربنا يهديها ليكم اسمها مدام مها ست غريبه وعصبيه اوى بتقول ليها انا اتقبلت فى الشرطه بتطلع الكشف اللى عندها وبتديك ورقتين مختومين واحده هتروح بيها هيئه شئون العاملين بالدراسه والتانيه هتخليها معاك لما تيجى تخلى من الصحه
الورقه التانيه بتاعه الصحه خليها معاك لانك هتحتاجها اوعى تفرط فيها وصورها كام صوره علشان فى جامعات بتطلبها فى تحضير الماستر

وهتطلع على مبنى شئون العاملين بالدراسه
بتروح ليهم بيقولوا ليك جهز ورق
تركب من رمسيس اى عربيه الدويقه او الدراسه وتنزلك قدام مسجد الشرطه هتلاقى مبنى العاملين المدنيين وراه على طول
المهم هتروح هيقولوا ليكم قدموا ملف وهيدو كوا ورقه فيها المطلوب
تجهزوه وهتسحبوا ملف برده اسمه وثيقه تعارف دى بتروح امن الدوله والداخليه بتحروا عن سيادتك ده بيحصل فى السجون وفى الخدمات الاتنين
كل للى فات ده الخدمات والسجون مع بعض
ده هيكون مثلا فى اخر شهر اربعه
طول الوقت ده انت استلمت فى الصحه عادى خالص ومستنى نتيجه التحريات
ملحوظه صغيره كل لما خلصت الوثيقه دى بدرى كل لما استلمت بدرى
طيب تخلصوها بدرى ازاى بيبقا طالب كل اقاربك بتواريخ ميلادهم وبارقام بطاقاتهم
اعمامك عماتك اخوالك خاللاتك اجدادك اولادك زوجتك او زوجك
كل دول هتكتبهم فجهز الحاجات دى
السنه دى الناس اتاخرت اوى فى الاستلام كان فيه انتخابات الرياسه والناس مش فاضيه لينا
مش عارف سنتكم هتكون ازاى
لسا لغايه دلوقتى فيه ناس تحرياتها بتظهر
طيب الحمد لله
التحريات ظهرت خلاص هتاخد ورقه من الدراسه ان الشرطه عاوزاك وبتروح تخلى من المديريه اللى انت تبعها ثم الادراه ثم الوحده وترجع تانى على الاداره ثم المديريه
اول لما تخلص هتروح للدراسه هيدوك جواب لمصلحه السجون دى فى القللى ورا مستشفى النقل العام
تركب مترو وتنزل محطه احمد عرابى وهتسال عليها هتلاقيها جنب المترو مش هتتوه خالص
هتروح تديهم الورقه جوا الاداره الطبيه فى المصلحه بعد كده هتستنى معاهم لغايه ما يوزعوك على سجن
طبعا احنا كنا عاملين جروب على الفيس بوك اسمه تكليف الشرطه 2016
هتلاقوا عليه كل حاجه ان شاء الله والناس هناك متعاونه جدا جدا
ده الرابط بتاعه
https://www.facebook.com/groups/311121988947620/

التوزيع داخل السجون
انتا خلاص اتوزعت هيبقا ايه النظام جواه
اولا الشغل نفسه
كله شغل ممارس عام طبعا هتلاقى كل حاجه وخاصه لو سجن فيه 3000 مسجون ولا حاجه هتلاقى حالات حلوه على فكره بس لو فيه استاف يعلم بس مش هتلاقى حد يعلمك
من الاخر كده ما فيش اى استفاده علميه خالص خالص
طبعا تخصص الجلديه اللى مهتم بيه هيشوف كل حاجه هناك كل حاجه فعلا وهيتعلم كويس لانه هيطبق على عيانين بجد
طبعا انت مسئول عن كتابه تقارير للحالات واستلام حالات داخله السجن بتشوفهم هل الاصابت مثبوته جوا التقرير ولا لا
طبعا كل ده تحس انه مسئوليه وبلوه وكل حاجه بس هتاخد عليها عادى جدا ممكن تقول ايه القرف ده الواحد مخلص علشان يروح السجن اقللك انت رايح لهدف انك تحضر بدرى وتترحم من الصحه
خلاف ان زمالك بتوع اكاديميه الشرطه اقل حاجه هتلاقى اتنين تلاته معاك منهم وهما اللى عليهم المسئوليه انت مدنى اخرك خصم دا لو حصل مشكله لا قدر الله
خلاف ان التعامل مع الكتاب والممرضات جوا الاداره الصحيه مقرف انت هناك بتتعامل مع ظباط وبتلاقى احترام منهم لانك ممكن تقرفهم
الناس هناك بتحترم الدكتور جدا عساكر وظباط
وطبعا مساجين

طبعا لو فتحنا كلام فى الشغل هناك مش هنخلص علشان ما اطولش عليكم

مده العمل كام يوم ؟؟؟؟؟؟؟؟؟
بص يا سيدى انت المفروض تحضر 5 ايام وليك الجمعه اجازه ويوم راحه كمان ده عمل يومى من الساعه 9 الى الساعه 3 عصرا ده المفروض يحصل
بس اللى بيتم غير كدا انتا بتاخد نبطشيات 24 ساعه طبعا انتوا بتقسموها مع بعض ممكن اتنين يباتوا مع بعض ممكن واحد على حسب انت وزمايلك
النبطشيه الواحده بتاخد قدامها يوم راحه
كده لو اخدت نبطشيتين فى الاسبوع حلو اوى هتقعد يومين ونص وبقيه الاسبوع بتاعك عاوز تتعم اهلا وسهلا عاوز تشتغل برايفيت اللى يريحك
طبعا النبطشيه عليها فلوس عليها 89 جنيه يعنى اعلى من نبطشيه نايب الرعايه جوا مستشفى حكومى

طيب المرتب اد ايه
اولا انت بتقبض كله من الداخليه
بتتفنط كالاتى
المرتب نفسه بييجى على يوم 25 فى الشهر كده
واحنا وصلنا دلوقتى الى 1450
وبتاخد كمان حاجه اسمها حافز وزير 200 جنيه
وككمان حاجه اسمها حملات وحافز اجاده كله برده 200 يعنى كده كله 1850 جنيه
ضيف عليهم النبطشيات الواحده ب 89 جنيه هتعمل 8 فى الاسبوع مثلا كده تعمل لييك 700 مع اللى فوق تعمل ليك تقريبا 2500
2500
طبعا المرتب معقول وراحه فى الحضور بس ما فيش تعليم قوى
اقللك اكنك فى يومين برايفيت كويس
وبتتطلع تتعلم بعده او تشتغل برايفيت او تلعب فى بقيه الاسبوع

تحضير الماستر
اول لما بتستلم جوا السجن اللى انت اتوزعت عليه بتكتب طلب للمامور بتاع السجن ويوافق ليك عليه انك عاوز تحضر ماستر فى تخصص كذا
وتوديه ااالادراه الطبيه جوا مصلحه السجون هيطلعوا ليك موافقه للجامعه اللى سيادتك عاوز تحضر فيها
طبعا كل التخصصات متاحه الا الاطفال والنسا مقفوله خالص
تانى الا الاطفال والنسا
نصيحه بقا كل واحد يقدم فى جامعته وخاصه لو تقديره مش عالى
لان كل الجامعات عامله موضه انهم بيقبلوا خريجيهم بس فالفرصه الاقرب ليك هتكون فى جامعتك
طبعا لسا فى كلام كتير بس ده اللى يهمكم دلوقتى واى استفسار اتفضلوا
معلش طولت عليكم
رجاء نشره لجميع حتى تعم الفائده
بالتوفيق ان شاء الله

التقديم بيبتدي من امتى؟؟؟؟؟

You may also like...

Add a Comment

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.